Jo Khayal The Na Qayas The Wahi Log Mujhse Bichhad Gae

Etibar Sajid

jo khayal the na qayas the vahi log mujh se bichhad gae

jo mohabbaton ki asaas the vahi log mujh se bichhad gae

jinhen manta hi nahin ye dil vahi log mere hain ham-safar

mujhe har tarah se jo raas the vahi log mujh se bichhad gae

mujhe lamha-bhar ki rafaqaton ke sarab aur sataenge

miri umr-bhar ki jo pyaas the vahi log mujh se bichhad gae

ye khayal saare hain aarzi ye gulab saare hain kaghzi

gul-e-arzu ki jo baas the vahi log mujh se bichhad gae

jinhen kar saka na qubul main vo sharik-e-rah-e-safar hue

jo miri talab miri aas the vahi log mujh se bichhad gae

miri dhadkanon ke qarib the miri chaah the mira khvab the

vo jo roz-o-shab mire paas the vahi log mujh se bichhad gae