Dagh Dehlvi
hua jab samna us khub-ru se
uda hai rang gul ka pahle bu se
ye ankhen tar jo rahti hain lahu se
vo guzre ishq ke din aabru se
ise kahiye shahadat-nama-e-ishq
use likkha hai khat apne lahu se
dhuan ban kar udi missi ki rangat
ye kis ne jal ke tere hont chuse
raqibon ko tamanna hai to bashad
tumhen matlab parai aarzu se
vo gul-takiya mire marqad men rakhna
moattar ho jo zulf-e-mushk-bu se
nai zid hai ki dil ham muft lenge
bhala kya faeda is guftugu se
adu bhi tum ko chahe ai tiri shaan
ladate hain ham apni aarzu se
hua hai tu to shahid-baz ai dil
bachaun tujh ko kis kis khub-ru se
laga rakkhi hai khaak us rahguzar ki
tayammum apna badh kar hai vuzu se
hamara dil use ab dhundta hai
thake hain paanv jis ki justuju se
khuda jaane chhalava tha ki bijli
abhi nikla hai koi ru-ba-ru se
hua hai ‘dagh’ aasif ka namak-khvar
guzar jaae ilahi aabru se
Leave a Reply