Bedam Shah Warsi
main ghash men huun mujhe itna nahin hosh
tasavvur hai tira ya tu ham-aghosh
jo nalon ki kabhi vahshat ne thani
pukara zabt bas khamosh khamosh
kise ho imtiyaz-e-jalva-e-yar
hamen to aap hi apna nahin hosh
utha rakkha hai ik tufan tu ne
are qatre tira allah-re josh
main aisi yaad ke qurban jaun
kiya jis ne do-alam ko faramosh
hai beganon se khali khalvat-e-raz
chale jaaen na ab aaen mire hosh
kaaro rindo gunah-e-mai-parasti
ki saaqi hai ata-pash-o-khata-posh
tire jalve ko muusa dekhte kya
naqab uthne se pahle ud gae hosh
karam bhi us ka mujh par hai sitam bhi
ki pahlu men hai zalim aur ru-posh
piyo to khum ke khum pi jaao ‘bedam’
are mai-nosh ho tum ya bala-nosh
Leave a Reply