Sufi
khayal kar ke jo main ne dekha usi ki surat chamak rahi hai
usi ka naqsha hai char-janib usi ki rangat damak rahi hai
tumhare faiz-e-qadam se jaana hua hai sarsabz bagh-e-alam
tamam is gulshan-e-jahan men tumhari khushbu mahak rahi hai
na dard jaega chara-sazo abas tumhari hai fikr-o-koshish
kisi hasin ki ye nok-e-mizhgan hamare dil men khatak rahi hai
ye bagh-e-alam men rang dekha koi hai ghamgin koi hai khandan
kahin hai shor-o-fughan kahin pe bulbul chahak rahi hai
ajab tarah ki ye kashmakash hai ki ham ko hai intizar-e-janan
kamar ko bandho uthao bistar ajal sirhane ye bak rahi hai
basi gulon men usi ki bu hai pari-vashon men usi ki khu hai
buton ke parde men dekh ‘aughat’ usi ki surat jhalak rahi hai
Leave a Reply