Phir Mizaj Us Rind Ka Kyunkar Mile

Poet

phir mizaj us rind ka kyunkar mile

jis ko us ke haath se saghar mile

ye bhi milna hai ki bad-az-sad-talash

hadd-e-vahm-o-fahm se bahar mile

kuchh na puchho kaisi nafrat ham se hai

ham hain jab tak vo hamen kyunkar mile

meri ankhen aur us ki khak-e-pa

tere kuche ka agar rahbar mile

vasl hai sar-josh-e-sahba-e-fana

phir agar koi mile kyunkar mile

milne ke pahle fana hona zarur

phir fana jo ho gaya kyunkar mile

‘asi’-e-giryan mila mahbub se

gul se shabnam jis tarah ro kar mile