Aamir Suhail
kahaniyon ne zara khinch kar badan apne
haram-sara se bulaya hamen vatan apne
khule gale ki qamisen khule gale ke firaq
ye ladkiyan hain badalti hain pairahan apne
ghadar ke phuul sajati hain aise balon men
sambhal sakti hon jaise bhare badan apne
ajab bhadak hai sharabon ki aur ankhon ki
bala hai husn bidakne lage hain ban apne
parae dard ki thikri se ghar karen raushan
ki siflagi ki riyazat men hain magan apne
ye inkisar ke putle ye sim-o-zar ki sana
ye maskhare hain ki chole men gorkan apne
hamen nikalo gharon ki kamin gahon se
lahu ke ram se dahakne lage khutan apne
ham ehtiyaj ke hujron se rizq chunte hue
zamin ke khvan pe rakhne lage lagan apne
ye arzuon ke chaqmaq se jale siine
jo atishin hain magar nochte hain tan apne
yahan zamin pe balve yahan zamin pe fasad
nikal rakhte hain sanduq se kafan apne
vo baas duur ke khaton ki auraton men udi
jise jahazon men laae the ham-sukhan apne
Leave a Reply