Aabid Adeeb
kar-nama ai gham-e-dil kuchh tira ye kam nahin
bah gae ankhon se dariya aur ankhen nam nahin
saaf tha har lafz us ki be-badal taqrir ka
phir lahu ne naqsh jo chhode hain vo mub.ham nahin
har zamane men nahin pahchanna mushkil unhen
sar qalam hote rahenge un ke lekin gham nahin
karbala hi ne kiye hain murtasim dil par nuqush
varna is duniya men gham ki vardaten kam nahin
dil hi dil vo bhigi lakdi ki tarah sulga kiya
us ke chehre se to lagta tha ki koi gham nahin
kaifiyat kaisi ajab is shahr ki yadon ki hai
garm hai atish nahin aur sard hai shabnam nahin
ik alag tahzib hai tanhaiyon ke shahr ki
ek hi aalam hamesha aur koi mausam nahin
phir rahe hain log phir hathon men sang-reze liye
aur apne sar men sauda is ghadi kuchh kam nahin
ham se ‘abid’ apne rahbar ko shikayat ye rahi
aankh munde un ke pichhe chalne vaale ham nahin
Leave a Reply