Poet
qaazi ke munh pe maari hai botal sharab ki
ye umr bhar men ek hui hai savab ki
ai yaar tere lab pe tabassum nahin numud
paida hai mah-e-nau se kiran aftab ki
aaya mizha pe lakht-e-dil-e-be-qarar yaad
gardish jo ham ne siikh pe dekhi kabab ki
teri kuduraton ne mujhe khaak kar diya
tere ghubar ne miri mitti kharab ki
meri khataen aa nahin sakti shumar men
ginti ho kya tire karam-e-be-hisab ki
saaqi tire karam se ye ummid hai mujhe
ho roz-e-hashr haath men botal sharab ki
mastan-e-ishq aae taalli par ai falak
ab khair maang tu qadah-e-aftab ki
nashsha zamin se su-e-falak le uda mujhe
saaqi sharab ne miri mitti kharab ki
do rose ja ke abna-ruyon ki bazm men
kya shakl ho gai dil-e-khana-kharab ki
bijli nahin tadapti hai ai dil ye asman
parvaz uda raha hai tire iztirab ki
abru ki tegh se jo bacha main to yaar ne
barchhi lagai badh ke nigah-e-itab ki
allah re asar miri bakht-e-siyah ka
piiri men ehtiyaj nahin hai khizab ki
‘nazim’ mire gunah hain bahar hisab se
tashvish kuchh nahin mujhe roz-e-hisab ki
Leave a Reply