Poet
kabhi khuun hoti hue aur kabhi jalte dekha
dil ko har baar naya rang badalte dekha
jab ye chaha ki likhen vasf-e-safa-e-rukh-e-yar
safhe par pa-e-qalam ham ne phisalte dekha
mai men ye baat kahan jo tire diide men hai
jis ko dekha ki gira phir na sambhalte dekha
uf re soz-e-dil-e-ashiq ki lahad par us ke
sang-e-marmar sifat-e-barf pighalte dekha
dil ke lene men ye qudarat use allah na de
jis ko mitti ke khilaune pe machalte dekha
dil ka kya rang hai tum phir bhi na samjhe afsos
chashma-e-chashm se khunab ubalte dekha
hai ye saaqi ki karamat ki nahin jaam ke paanv
aur phir bazm men sab ne use chalte dekha
vaiz-o-shaikh sabhi khuub hain kya batlaun
main ne maikhane se kis kis ko nikalte dekha
parda kyuun karta hai ‘nazim’ tire ghar aae the
raat ko ham ne unhen bhes badalte dekha
Leave a Reply