Poet
be-diye le uda kabutar khat
yuun pahunchta hai uupar uupar khat
purze purze hua sarasar khat
ek khat ke bane bahattar khat
qatl hote hain nama-bar har roz
laash par laash aur khat par khat
roz ik nama-bar kahan se aae
yuun hi rakh chhodta huun likh kar khat
kya qalam ne sharar-fishani ki
phuljadi ban gaya mira har khat
chaar hainge kul un ke ham-sae
likh ke de aae aaj ham-sar khat
jo ki lete nahin hain mera naam
vo likhenge mujhe muqarrar khat
kis tarah sarnavisht ko badlun
khat men mil jaae ghair ke gar khat
padh to lenge vo naama mera bhi
aate rahte hain us ke aksar khat
dekh kar naam phenk denge zarur
phir na lenge kabhi mukarrar khat
dak-ghar men ticket nahin baaqi
‘nazim’ itne gae hain khat par khat
Leave a Reply