Iltija-E-Musafir

Allama Iqbal

farishte padhte hain jis ko vo naam hai tera

badi janab tiri faiz aam hai tera

sitare ishq ke teri kashish se hain qaaem

nizam-e-mehr ki surat nizam hai tera

tiri lahad ki ziyarat hai zindagi dil ki

masih o khizr se uncha maqam hai tera

nihan hai teri mohabbat men rang-e-mahbubi

badi hai shaan bada ehtiram hai tera

agar siyah dilam dagh-e-lala-zar-e-tavam

digar kushada jabinam gul-e-bahar-e-tavam

chaman ko chhod ke nikla huun misl-e-nikhat-e-gul

hua hai sabr ka manzur imtihan mujh ko

chali hai le ke vatan ke nigar-khane se

sharab-e-ilm ki lazzat kashan kashan mujh ko

nazar hai abr-e-karam par darakht-e-sahra huun

kiya khuda ne na mohtaj-e-baghban mujh ko

falak-nashin sifat-e-mehr huun zamane men

tiri dua se ata ho vo nardban mujh ko

maqam ham-safaron se ho is qadar aage

ki samjhe manzil-e-maqsud karvan mujh ko

miri zaban-e-qalam se kisi ka dil na dukhe

kisi se shikva na ho zer-e-asman mujh ko

dilon ko chaak kare misl-e-shana jis ka asar

tiri janab se aisi mile fughan mujh ko

banaya tha jise chun chun ke khaar o khas main ne

chaman men phir nazar aae vo ashiyan mujh ko

phir aa rakhun qadam-e-madar-o-pidar pe jabin

kiya jinhon ne mohabbat ka raz-dan mujh ko

vo sham-e-bargah-e-khandan-e-murtazvi

rahega misl-e-haram jis ka astan mujh ko

nafas se jis ke khili meri aarzu ki kali

banaya jis ki muravvat ne nukta-dan mujh ko

dua ye kar ki khudavand-e-asman-o-zamin

kare phir us ki ziyarat se shadman mujh ko

vo mera yusuf-e-sani vo sham-e-mahfil-e-ishq

hui hai jis ki ukhuvvat qarar-e-jan mujh ko

jala ke jis ki mohabbat ne daftar-e-man-o-tu

hava-e-aish men paala kiya javan mujh ko

riyaz-e-dahr men manind-e-gul rahe khandan

ki hai aziz-tar az-jan vo jan-e-jan mujh ko

shagufta ho ke kali dil ki phuul ho jaae

ye iltija-e-musafir qubul ho jaae