Sheikh Ibrahim Zauq
juda hon yaar se ham aur na ho raqib juda
hai apna apna muqaddar juda nasib juda
tiri gali se nikalte hi apna dam nikla
rahe hai kyuun ki gulistan se andalib juda
dikha de jalva jo masjid men vo but-e-kafir
to chikh utthe moazzin juda khatib juda
juda na dard-e-judai ho gar mire aaza
huruf-e-dard ki surat huun ai tabib juda
hai aur ilm o adab maktab-e-mohabbat men
ki hai vahan ka moallim juda adiib juda
hujum-e-ashk ke hamrah kyuun na ho naala
ki fauj se nahin hota kabhi naqib juda
firaq-e-khuld se gandum hai sina-chak ab tak
ilahi ho na vatan se koi gharib juda
kiya habib ko mujh se juda falak ne magar
na kar saka mire dil se gham-e-habib juda
karen judai ka kis kis ki ranj ham ai ‘zauq’
ki hone vaale hain ham sab se an-qarib juda
Leave a Reply