Sheikh Ibrahim Zauq
barq mera ashiyan kab ka jala kar le gai
kuchh jo khakistar bacha andhi uda kar le gai
us ke qadmon tak na betabi badha kar le gai
haae do palte diye aur phir hata kar le gai
na-tavani ham ko hathon haath utha kar le gai
chyunti se chyunti daana chhuda kar le gai
subh-e-rukh se kaun sham-e-zulf men jaata tha aah
ai dil-e-shamat-zada shamat laga kar le gai
khuun se farhad ke rangin hua daman-e-koh
kyuun na mauj-e-shir ye dhabba chhuda kar le gai
tum ne to chhoda hi tha ai hamrahan-e-qafila
lekin avaz-e-jaras ham ko jaga kar le gai
nok-e-mizhgan jab hui sina-fagaron se do-char
para-ha-e-dil se gul-dasta bana kar le gai
dekhi kuchh dil ki kashish laila ki naaqe ko tire
su-e-majnun akhirash rasta bhula kar le gai
vaah ai soz-e-darun kuche men us ke barq-e-ah
raat ham ko har qadam mishal dikha kar le gai
vo gae ghar ghair ke aur yaan hamen dam bhar ke baad
bad-gumani un ke ghar su ghar phira kar le gai
jo shahid-e-naz kuche men tumhare tha pada
kya kahun taqdir use kyunkar utha kar le gai
dasht-e-vahshat men bagula tha ki divana tira
ruh-e-majnun bahr-e-istiqbal aa kar le gai
aag men hai kaun gir padta magar parvane ko
atish-e-soz-e-mohabbat thi jala kar le gai
ai pari pahlu se mere kya kahun teri nigah
dil uda kar le gai ya par laga kar le gai
‘zauq’ mar jaane ka to apne koi mauqa na tha
ku-e-janan men ajal nahaq laga kar le gai
Leave a Reply