Khiraj-Aqidat

Asrarul Haq Majaz

ik naya paghambar-e-amn-o-aman paida hua

karvan men ik amir-e-karvan paida hua

ek khizr-e-ahd-e-hazir ik kalim-e-ahd-e-nau

ek sadr-e-mahfil-e-ruhaniyan paida hua

ik hudi-khvan-e-mohabbat ik naqib-e-ittihad

ik fida-e-soz-e-naqus-o-azan paida hua

haq ka saudai haqiqat ka ilm khole hue

sidq ka shaida safa ka pasban paida hua

sar-ba-sar ik muzhda-e-taskin-e-mardan-e-zaif

quvvat-e-bazu-e-yaran-e-javan paida hua

is chaman ki sarzamin hai ru-kash-e-haft-asman

is chaman men tair-e-arsh-ashiyan paida hua

ik gul-e-taza jo murjha kar bhi murjhaya nahin

safha-e-hasti pe naqsh-e-javedan paida hua

khuun se is ke aaj bhi gul-rang hai khak-e-vatan

fakhr-e-alam nazish-e-hindostan paida hua