Shah Naseer
baad-e-majnun kyuun na huun main kar-farma-e-junun
ishq ki sarkar se malbus-e-rusvai mila
khuub sa sidha banega dekh ai sarv-e-chaman
us ki raanai se mat tu apni zebai mila
jal gaya parvana jis dam mahfil-arai ke saath
khaak men sab shama ne di mahfil-arai mila
tala-e-bedar ki minnat uthane bhi na di
is se shab ham ko tamanna khvab men laai mila
apni qismat men azal se thi likhi sar-gashtagi
gard-o-bad-asa jo kar-e-dasht-paimai mila
vah-va rahmat hai us ko aur mujh ko afrin
raah men ban kar asa jo khar-e-sahrai mila
dast-giri bhi na ki tu ne ki jo naqsh-e-qadam
khaak men main teri khatir ai tavanai mila
sar-kashi ai charkh mat kar dekh pesh-e-‘aftab’
khaak men dega ye saari teri khud-arai mila
Leave a Reply