Aati Thi Pahle dil Se Kabhi Bu Kabab Ki

Riyaz Khairabadi

aati thi pahle dil se kabhi bu kabab ki

raushan hai ab to siine men bhatti sharab ki

itna itaab surkh hai rangat naqab ki

tar-e-naqab hain ki nigahen itaab ki

dekhe koi jhalak na rukh-e-la-javab ki

sattar hazar pardon men thahri hijab ki

kyuun hashr men ho fikr azab-o-savab ki

sohbat hai ye bhi ek sharab-o-kabab ki

kahte hain vaada raat ko hoga vafa zarur

allah jald shaam ho roz-e-hisab ki

bijli vo chiiz hi nahin jis se hasin daren

kuchh dard ki chamak hai jhalak iztirab ki

vo sham-o-subh sadqe ho jin par bahar-e-gul

chun chun ke saath laae hain raten shabab ki

jannat ke khvab dekh ke aati hain ham ko yaad

rindana sohbaten vo kabab-o-shabab ki

aina dekhte hain mujhe dekh dekh kar

ye daad mil rahi hai mire intikhab ki

le apne sar vabal na auron ka hashr men

bar-e-gunah uthae na mizan hisab ki

ai taur soz-e-barq samajhte hain ham tujhe

tujh men to shokhiyan hain kisi ke hijab ki

daave hai hamsari ka sar-e-kaj-kulah se

ai dast-e-mauj utaar le topi habab ki

bijli giraen tuur par avaz hi se vo

thahre kabhi to ham se saval-o-javab ki

phir bhi to kuchh sabat ko us ke zarar nahin

ulti ravan hai bahr men kashti habab ki

mai se kahin siva hai pas-e-tauba mai-kasho

aa jaae duur hi se kahin bu sharab ki

so hashr nazr-e-gosha-e-daman hain har-nafas

ai shauq-e-did had hi nahin iztirab ki

talkhi ka nazaa ki to kuchh ehsas ho sake

itni to mere munh men ho talkhi sharab ki

tum kya ho ham ne qulqul-e-mina se vaizo

baten bahut suni hain azab-o-savab ki

daur-e-mai-e-kuhan ka asar hai ye ai ‘riyaz’

hai aaj bhi javan tabiat janab ki