Poet
jo chup rahun to bataen vo ghungniyan munh men
jo kuchh kahun to kahen qainchi hai zaban munh men
ye ek baat hai qasid jo bhejta huun tujhe
vagarna dil men jo un ke hai vo yahan munh men
zamin ka kar diya paivand ham ko ai zalim!
na ab bhi khaak pade tere asman munh men
na kaan rakh ke kisi ne suni hazar afsos
tamam umr rahi gham ki dastan munh men
vo aise bigde hue hain ki daant piste hain
ham aise chup hain ki goya nahin zaban munh men
ye baat kya hai jo honton men badbadate ho
kaho na shauq se jo aae meri jaan munh men
daro asar se khuda jaane kya ho kya kuchh ho
ghuta hua hai abhi aah ka dhuan munh men
kabhi girane na do aansu haal par mere
lo aao paani to tapkao meri jaan munh men
zaban par hai ye kis kis ki tazkira apna
padi hai baat na meri kahan kahan munh men
phir aise vaade se taskin ho kis tarah meri
”nahin” hai dil men tumhare agar hai ”han” munh men
usi ka dhyan hai jab tak ki tan men jaan hai ‘nizam’
usi ka zikr hai jab tak ki hai zaban munh men
Leave a Reply