Poet
chhed manzur hai kya ashiq-e-dil-gir ke saath
khat bhi aaya kabhi to ghair ki tahrir ke saath
go ki iqrar ghalat tha magar ik thi taskin
ab to inkar hai kuchh aur hi taqrir ke saath
pech qismat ka ho to kya kare is men koi
dil ko vabastagi hai zulf-e-girah-gir ke saath
vo bhi kahte hue kuchh duur tak aae pichhe
ham jo us bazm se nikle bhi to tauqir ke saath
ye bhi ik vasl ki surat thi magar rashk-e-nasib
us ki tasvir kabhi ghair ki tasvir ke saath
vada-e-subh pe ab kis ko yaqin ho qasid
aaj to jaan gai nala-e-shab-gir ke saath
kaho ranjish ka sabab kuchh nahin meri hi suno
uzr to chahiye karna mujhe taqsir ke saath
aap dete hain aziyyat hi shikayat ki evaz
kuchh zaban se bhi to farmaiye tazir ke saath
dekhiye mil hi gaya aap se vo shokh ‘nizam’
kaam jo kuchh kare insan sau tadbir ke saath
Leave a Reply