Nazeer Akbarabadi
baithe hain ab to ham bhi bologe tum na jab tak
dekhen to aap ham se na-khush rahenge kab tak
iqrar tha sahar ka aisa hua sabab kya
jo shaam hone aai aur vo na aaya ab tak
mahfil men gul-rukhon ke aaya jo vo pari-ru
ho shakl-e-hairat us ki surat rahe vo sab tak
bosa ‘nazir’ ham ko dene kaha tha us ne
ham vaqt pa ke jis dam lene ki pahunche dhab tak
har chand tha nashe men vo shokh to bhi us ne
hargiz hamare lab ko aane diya na lab tak
Leave a Reply