Naseh-E-Mushfiq Ye Mashq-E-Taza Farmane Lage

Poet

naseh-e-mushfiq ye mashq-e-taza farmane lage

din to tha ab raat ko bhi aa ke samjhane lage

hazrat-e-vais kahin daulat-sara ko jaiye

aate hi saman-e-mahshar aap dikhlane lage

aa gae jab yaad kuchh us rabt baham ke maze

dil bhar aaya dida-e-tar ashk barsane lage

phir subu undle bhare shishe hue labrez jaam

laghzish-e-pa apni apni mast dikhlane lage

baghban hushiyar ho mushtaq-e-rukhsat hai bahar

rang badla gulistan ka phuul murjhane lage

jalva-ha-e-husn chamke uth gae munh se naqab

turra-e-gesu ke baham saanp lahrane lage

haath utha ai charagar darman-e-be-tasir se

ja-e-ashk ankhon se ab lakht-e-jigar aane lage

khuub roe dekh kar ham zevar-e-divangi

jab ahibba paanv men zanjir pahnane lage

bhtiyan raushan huiin chamki dukan-e-mai-farosh

rukhsat-e-tauba hui zuhhad ghabrane lage

fasl-e-gul aai badhe josh-e-junun ke valvale

di sada zanjir ne phir paanv khujlane lage

mane-e-matlab hui vo sharam baham ai ‘nasim’

vo ruke apni taraf ham aap sharmane lage