Asrarul Haq Majaz
siine men un ke jalve chhupae hue to hain
ham apne dil ko tuur banae hue to hain
tasir-e-jazb-e-shauq dikhae hue to hain
ham tera har hijab uthae hue to hain
haan kya hua vo hausla-e-did-e-ahl-e-dil
dekho na vo naqab uthae hue to hain
tere gunahgar gunahgar hi sahi
tere karam ki aas lagae hue to hain
allah-ri kamyabi-e-avargan-e-ishq
khud gum hue to kya use paae hue to hain
yuun tujh ko ikhtiyar hai tasir de na de
dast-e-dua ham aaj uthae hue to hain
zikr un ka gar zaban pe nahin hai to kya hua
ab tak nafas nafas men samae hue to hain
mitte huon ko dekh ke kyuun ro na den ‘majaz’
akhir kisi ke ham bhi mitae hue to hain
Leave a Reply