Mirza Raza Barq
kis tarah milen koi bahana nahin milta
ham ja nahin sakte unhen aana nahin milta
phirte hain vahan aap bhatakti hai yahan ruuh
ab gor men bhi ham ko thikana nahin milta
badnam kiya hai tan-e-anvar ki safa ne
dil men bhi use raaz chhupana nahin milta
daulat nahin kaam aati jo taqdir buri ho
qarun ko bhi apna khazana nahin milta
ankhen vo dikhate hain nikal jaae agar baat
bosa to kahan hont hilana nahin milta
taqat vo kahan jaaen tasavvur men jo ai ‘barq’
barson se hamen hosh men aana nahin milta
Leave a Reply