Ameer Minai
kis ke chamke chand se rukhsar qiasar-bagh men
chandni hai saya-e-divar qiasar-bagh men
fil-haqiqat ye bhi kam gulzar-e-jannat se nahin
huren phirti hain sar-e-bazar qiasar-bagh men
paanv ka yaan zikr kaisa saaf hai aisi zamin
dil phisalte hain dam-e-raftar qiasar-bagh men
zer-e-shakh-e-gul agar sabza kabhi sone laga
shor-e-bulbul ne kiya bedar qiasar-bagh men
itne patte bhi na honge gulshan-e-firdaus men
jis qadar phulon ke hain ambar qiasar-bagh men
tishnigan-e-shauq hain shirin-labon ke mehman
bat raha hai sharbat-e-didar qiasar-bagh men
qatre shabnam ke rag-e-gul par dikhate hain bahar
gundh rahe hain motiyon ke haar qiasar-bagh men
saya-e-bal-e-huma kya dhundhta hai ai ‘amir’
baith zer-e-saya-e-divar qiasar-bagh men
Leave a Reply