Chand Sa Chehra Nur Ki Chitwan Masha-Allah Masha-Allah

Ameer Minai

chand sa chehra nuur ki chitvan masha-allah masha-allah

turfa nikala aap ne joban masha-allah masha-allah

gul rukh-e-nazuk zulf hai sumbul aankh hai nargis seb-e-zanakhdan

husn se tum ho ghairat-e-gulshan masha-allah masha-allah

saqi-e-bazm-e-roz-e-azal ne bada-e-husn bhara hai is men

ankhen hain saghar shisha hai gardan masha-allah masha-allah

qahr ghazab zahir ki rukavat afat-e-jan dar-parda lagavat

chaah ki tevar pyaar ki chitvan masha-allah masha-allah

ghamza uchakka ishva hai daaku qahr adaen sehr hain baten

chor nigahen naaz hai rahzan masha-allah masha-allah

nuur ka tan hai nuur ke kapde us par kya zevar ki chamak hai

chhalle kangan ikke joshan masha-allah masha-allah

jama kiya ziddain ko tum ne sakhti aisi narmi aisi

mom badan hai dil hai aahan masha-allah masha-allah

vaah ‘amir’ aisa ho kahna sher hain ya maashuq ka gahna

saaf hai bandish mazmun raushan masha-allah masha-allah