Poet
kaun aaega jo tu be-sar-o-saman hoga
varna hoga tu na andesha-e-darban hoga
qatl ke baad bhi ik aish ka saman hoga
mai-e-gul-rang lahu zakhm namak-dan hoga
bankpan bas ki hai manzur mire qatil ko
gul-e-dastar bhi ab ghuncha-e-paikan hoga
ik nazar dekh sakega na tiri chashm-e-siyah
sabza-e-khat bhi charagah-e-ghazalan hoga
tu vahan bhi jo na ho yaar to phir hai andher
roz-e-mahshar pe guman-e-shab-e-hijran hoga
dilbaro dil ke na le jaane men israr karo
tum ko kya faeda hoga mira nuqsan hoga
jaate hain sabr o qarar o khirad o hosh o havas
jaras-e-qafila apna dil-e-nalan hoga
mere iisa se mire dard ka darman hoga
sharbat-e-vasl ilaj-e-tap-e-hijran hoga
vaaiz ham ko tu na hangama-e-mahshar se dara
apne nazdik vo ik majma-e-yaran hoga
aaina dida-e-hairan tujhe dikhlaega
shana-e-zulf mira hal-e-pareshan hoga
dil-e-be-ishq se kaunain men tu hoga kharab
barhaman dair men kaabe men musalman hoga
gar ye hain dast-e-junun aur vo hain khar-e-junun
na to daman hi rahega na gareban hoga
shakh-e-gul hai qalam-e-fikr to ashar hain gul
‘arsh’ divan mira rashk-e-gulistan hoga
Leave a Reply