Meer Hasan
daman ko us ke khinchen aghyar sab taraf se
aur aah ham ye khinchen azar sab taraf se
jab kam-e-dil na hargiz hasil hua kahin se
dil ko utha ke baithe na-char sab taraf se
ji chahta hai is ke kuche men baith rahiye
kar tark-e-ashnai yakbar sab taraf se
tujh paas bhi na aaven ham ab to jaaen kidhar
tu ne to ham ko khoya ai yaar sab taraf se
mizhgan se us ke kyunkar dil chhut sake hamara
ghere hue hain is ko ve khaar sab taraf se
parde hazar hoven haail pa husn us ka
deta hai talibon ko didar sab taraf se
kona bhi ek dil ka sabit nahin ye kis ne
is ghar ko kar diya hai mismar sab taraf se
naala zaiif apna pahunchega kyunki vaan tak
ki hai buland us ne divar sab taraf se
ik baar to azizan tum mil ke haal mera
kar baitho us ke aage izhar sab taraf se
divana ho ke chhuta duniya se varna yaran
hote gale ke mere tum haar sab taraf se
ve din bhi aah koi kya the ki jin dinon men
dil ko khushi thi apne dildar sab taraf se
bas tere gham men aa kar ab khaak ho gae ham
dil bujh gaya hamara ik baar sab taraf se
zikr-e-vafa-o-ulfat mat chhed bas ‘hasan’ ab
ji ho raha hai apna bezar sab taraf se
Leave a Reply