Poet
kaun hote hain vo mahfil se uthane vaale
yuun to jaate bhi magar ab nahin jaane vaale
ah-e-pur-soz ki tasir buri hoti hai
khush rahenge na gharibon ko satane vaale
kucha-e-yar men ham ko to qaza laai hai
jaan jaegi magar ham nahin jaane vaale
ham ko kya kaam kisi aur pari se tauba
aap bhi khuub hain be-par ki udane vaale
jis qadar chahiye bithlaiye pahre dar par
band rahne ke nahin khvab men aane vaale
kya qayamat hai ki rulva ke hamen ai ‘jauhar’
qahqahe maar ke hanste hain rulane vaale
Leave a Reply