Ismail Merathi
ek bachcha ki abhi kuchh use tamiz na thi
lahv-bazi se pasandida koi chiiz na thi
khelna kudna khana yahi maamul tha bas
inhin tiflana tamannaon men mashghul tha bas
ek talab tha do-char qadam ghar se pare
dil men lahr aai lab-e-ab zara sair kare
saaf paani se jo talab ko paaya labrez
khel ka shauq tabiat men hua aur bhi tez
as-pas apne jo paaya koi kankar patthar
phenk maara use paani men bahut khush ho kar
khel tha pahle to ab turfa-tamasha dekha
dil hi dil men mutahayyar tha ki ye kya dekha
daera ek bana aisa ki badhta hai muhit
gher li jis ne ki talab ki sab sath-e-basit
phir to khel us ka isi shaghl pe mauquf raha
isi nazzare men ta-der vo masruf raha
isi asna men hua bachche ki maan ka bhi guzar
bola amman mujhe aai hai ajab chiiz nazar
jo na dekhi na suni thi kabhi ab se pahle
shayad aai hai nazar mujh ko hi sab se pahle
ik zara si harakat aur ye tasir ajiib
daera badh ke pahunchta hai kinare ke qarib
bas-ki ji jaan se is shobade par tha shaida
vusat-e-daera ki apni amal se paida
thi vo maan ahl-e-dil aur nek-manush nek-nihad
hans ke farmaya miri jaan ye nasihat rakh yaad
yunhi har kaam ka ho jaata hai anjam bada
go ki aghaz men hota nahin vo kaam bada
kabhi adna harakat zalzala ban jaati hai
kabhi nachiz si ik baat ghazab dhati hai
yahi andaz-e-nikokari o bad-kari hai
avvalan khaas thi ab aam men vo jaari hai
Leave a Reply