Insha Allah Khan Insha
jo baat tujh se chahi hai apna mizaj aaj
qurban teri kal pe na taal aaj aaj aaj
dahki hai aag dil men pade ishtiyaq ki
tere sivae kis se ho is ka ilaaj aaj
hai fauj fauj-e-ghamza-o-andaz tere saath
aqlim-e-naz ka hai tujhe takht-o-taj aaj
tera vo husn hai ki jo hota to bhejta
yusuf zamin-e-misr se tujh ko khiraj aaj
khuban-e-rozgar muqallid tire hain sab
jo chiiz tu kare so vo paave rivaj aaj
ab-e-zulal-e-vasl se andoh-e-dard-o-hijr
napaid ghul ke hota hai kya misl-e-zaj aaj
‘insha’ se apne aur ye inkar haif hai
laaya hai vo kabhi na kabhi ehtiyaj aaj
Leave a Reply