Qatl-E-Aftab

Ali Sardar Jafri

shafaq ke rang men hai qatl-e-aftab ka rang

ufuq ke dil men hai khanjar lahu-luhan hai shaam

safed shisha-e-nur aur siyah barish-e-sang

zamin se ta-ba-falak hai buland raat ka naam

yaqin ka zikr hi kya hai ki ab guman bhi nahin

maqam-e-dard nahin manzil-e-fughan bhi nahin

vo be-hisi hai ki jo qabil-e-bayan bhi nahin

koi tarang hi baaqi rahi na koi umang

jabin-e-shauq nahin sang-e-astan bhi nahin

raqib jiit gae khatm ho chuki hai jang

dilon men shola-e-gham bujh gaya hai kya kiije

koi hasin nahin kis se ab vafa kiije

sivae is ke ki qatil hi ko dua diije

magar ye jang nahin vo jo khatm ho jaae

ik intiha hai faqat husn-e-ibtida ke liye

bichhe hain khaar ki guzrenge qafile gul ke

khamoshi mohr-ba-lab hai kisi sada ke liye

udasiyan hain ye sab naghma-o-nava ke liye

vo pahna shama ne phir khun-e-aftab ka taaj

sitare le ke uthe nur-e-aftab ke jaam

palak palak pe firozan hain ansuon ke charagh

laven lachakti hain ya bijliyan chamakti hain

tamam pairahan-e-shab men bhar gae hain sharar

hazar lab se zamin kah rahi hai qissa-e-dard

hazar gosh-e-junun sun rahe hain afsana

chatak rahi hain kahin tirgi ki divaren

lachak rahi hain kahin shakh-e-gul ki talvaren

sanak rahi hai kahin dasht-e-sar-kashi men hava

chahak rahi hai kahin bulbul-e-bahar-nava

mahak raha hai vafa ke chaman men dil ka gulab

chhalak rahi hai lab o aariz o nazar ki sharab

javan khvabon ke jangal se aa rahi hai nasim

nafas men nikhat-e-paigham-e-inqalab liye

khabar hai qafila-e-rang-o-nur niklega

sahar ke dosh pe ik taaza aftab liye