Hai Mohabbat Sab Ko Uske Abru-E-Khamdar Ki

Imam Bakhsh Nasikh

hai mohabbat sab ko us ke abru-e-khamdar ki

hind men kya aabru baaqi rahi talvar ki

vasl ki shab chandni divar se jaane na paae

minnaten karta huun har khar-e-sar-e-divar ki

ustura phirne se ru-e-yar par hai daur-e-khat

chaal us kam-bakht ne sikhi hai kya parkar ki

nashsha-e-mai ka guman karne laga vo bad-guman

dekh kar surkhi hamare dida-e-khun-bar ki

ghar bhi mera muntazir hai yaar ka meri tarah

rauzan-e-dar men hai surat dida-e-bedar ki

kahte ho ham khvab men aate jo tu sota kabhi

khuub ki barbad mehnat dida-e-bedar ki

bagh-e-alam men kahan hai koi mujh sa rahm-dil

roz karta huun ayadat nargis-e-bimar ki

dagh-e-sar hain josh-e-sauda men ba-rang-e-gul mujhe

misl-e-gulbun paanv men kab hai shikayat khaar ki

vo khuda ka dost hai aur dost hai us ka khuda

kyuun na ho ‘nasikh’ mohabbat haidar-e-karrar ki