Poet
aae hain ham jahan men gham le kar
dil-e-pur-khun o chashm-e-nam le kar
saghar-e-mai kahan hai ai gardun
kya karen tera jam-e-jam le kar
vaada aqsam kar chuka tu khilaf
ab ke chhodunga main qasam le kar
us ki mahfil se kab uthega raqib
ye saadat-bhare qadam le kar
tar-o-khushk-e-jahan pe qaane rah
dast-e-dauran se besh-o-kam le kar
sar se maara karen pade apne
go shahan tabl aur alam le kar
raah men teri zoaf se ‘hasrat’
chale har har qadam men dam le kar
Leave a Reply