Haidar Ali Aatish
kaun se dil men mohabbat nahin jaani teri
jis ko sunta huun vo kahta hai kahani teri
kuchh dahan hi nahin vahm-e-shoara ke nazdik
mu se barik kamar bhi hai gumani teri
jis ke aage se guzarta hai vo kahta hai yahi
dekhi ai ruh-e-ravan ham ne ravani teri
shisha-e-mai se koi meri zabani kah de
khush nahin aati hai ye pamba-e-dahani teri
kya tiri shaan hai qurban hon ai afv-e-karim
aas rakhta hai har ik fasiq o zaani teri
is kharabi men tire vaste phirte hain kharab
justuju ham ko hai ai kunj-e-nihani teri
ain ehsan hai mire safha-e-dil par mujh ko
ek tasvir agar khinch de ‘mani’ teri
subh tak shaam se karti hai zaban zikr-e-jamal
niind aati hai kise sun ke kahani teri
misl-e-gul hans ke kisi roz tu dil ko khush kar
khuun rulati hai hamen ghuncha-dahani teri
naz-o-andaz-o-ada men hai taraqqi dah-chand
fitna tifli thi qayamat hai javani teri
kaun se ghalla ka daana tu ai dana-e-khal
ham ne arzani men bhi paai girani teri
garm-joshi se jalaya kare kashf o khirman
barq ho sakti nahin shokhi men saani teri
jaan ki tarah se rakhta hai aziiz ai gul-ru
dagh-e-dil laala ne samjha hai nishani teri
misraa-e-tegh hai har misraa-e-mauzun ‘atish’
dekh li yaar miri saif-zabani teri
Leave a Reply