Farogh-E-dida-O-dil Lala-E-Sahar Ki Tarah

Ali Sardar Jafri

farogh-e-dida-o-dil lala-e-sahar ki tarah

ujala bin ke raho sham-e-rahguzar ki tarah

payambaron ki tarah se jiyo zamane men

payam-e-shauq bano daulat-e-hunar ki tarah

ye zindagi bhi koi zindagi hai ham-nafaso

sitara ban ke jale bujh gae sharar ki tarah

dara saki na mujhe tirgi zamane ki

andheri raat se guzra huun main qamar ki tarah

samundaron ke talatum ne mujh ko paala hai

chamak raha huun isi vaste guhar ki tarah

tamam koh o tal o bahr o bar hain zer-e-nagin

khula hua huun main shahin ke bal-o-par ki tarah

tamam daulat-e-kaunain hai khiraj us ka

ye dil nahin kisi luute hue nagar ki tarah

guzar ke khaar se ghunche se gul se shabnam se

main shakh-e-vaqt men aaya huun ik samar ki tarah

main dil men talkhi-e-zahrab-e-gham bhi rakhta huun

na misl-e-shahd huun shirin na main shakar ki tarah

khizan ke dast-e-sitam ne mujhe chhua hai magar

tamam shoala o shabnam huun kashmar ki tarah

miri nava men hai lutf-o-surur-e-subh-e-nashat

har ek sher hai rindon ki sham-e-tar ki tarah

ye fatehana ghazal asr-e-nau ka hai ahang

buland o past ko dekha hai dida-var ki tarah