Aal E Ahmad Suroor
jabr-e-halat ka to naam liya hai tum ne
apne sar bhi kabhi ilzam liya hai tum ne
mai-kashi ke bhi kuchh adab baratna sikho
haath men apne agar jaam liya hai tum ne
umr guzri hai andhere ka hi matam karte
apne shole se bhi kuchh kaam liya hai tum ne
ham faqiron se sataish ki tamanna kaisi
shahryaron se jo inaam liya hai tum ne
qarz bhi un ke muani ka ada karna hai
garche lafzon se bada kaam liya hai tum ne
un usulon ke kabhi zakhm bhi khaae hote
jin usulon ka bahut naam liya hai tum ne
lab pe aate hain bahut zauq-e-safar ke naghme
aur har gaam pe aram liya hai tum ne
Leave a Reply