Sarw-Qad Lala-Rukh O Ghuncha-dahan Yaad Aaya

Poet

sarv-qad lala-rukh o ghuncha-dahan yaad aaya

phir bahar aai mujhe lutf-e-chaman yaad aaya

go ki thi saltanat-e-misr magar akhir-e-kar

is hukumat pe bhi yusuf ko vatan yaad aaya

rag-e-gul par hai kabhi aur kabhi ghunche pe nigah

baagh men kis ki kamar kis ka dahan yaad aaya

safar-e-mulk-e-adam ki hui aisi ujlat

zad-e-rah kuchh na ba-juz gor-o-kafan yaad aaya

sohbat-e-lala-rukhan ahd-e-shabab-o-shab-e-vasl

mai-e-kohna jo mili dagh-e-kuhan yaad aaya

jab se aaya hai nazar ye tira husn-e-be-dagh

kabk ko maah na bulbul ko chaman yaad aaya

tere saudai ko phir josh hua vahshat ka

qaidi-e-zulf ko phir tauq-o-rasan yaad aaya

paan kha kar jo ugaal aap ne thuka sahab

jauhari mahv hue laal-e-yaman yaad aaya

baad muddat ke talab aap ne bande ko kiya

shukr-sad-shukr main ai mushfiq-e-man yaad aaya

fasl-e-gul aate hi ‘agha’ ne bhi vahshat ki li

kaisi ye chaal chala kis ka chalan yaad aaya