Poet
giri hai barq-e-tapan dil pe ye khabar sun kar
chadha diya hai bhagat-singh ko raat phansi par
utha hai nala-e-pur-dard se naya mahshar
jigar pe madar-e-bharat ke chal gae khanjar
shikasta-hal hua qaum ke habibon ka
badan men khushk lahu ho gaya gharibon ka
abhi to qaum ne ‘nehru’ ka gham uthaya tha
abhi to daas ki furqat ne hashr dhaya tha
abhi to hijr ka bismil ke zakhm khaya tha
abhi to koh-e-sitam charkh ne giraya tha
chale hain navak-e-bedad phir kalejon par
ki aaj uth gae afsos naujavan rahbar
adu vatan ko tashaddud se kya dabaenge
vo apne haath se fitne nae jagaenge
jo mulk-o-qaum ki devi pe sar chadhaenge
nisar ho ke shahidon men naam paenge
girega qatra-e-khun bhi jahan saputon ka
fida-e-hind vahan honge sainkadon paida
jahan se mulk-e-adam naunihal jaate hain
numayan kar ke sitam-kash ka haal jaate hain
gira ke hind men koh-e-malal jaate hain
vatan ko chhod ke bharat ke laal jaate hain
tadap rahe hain judai men be-qarar-e-vatan
chale hain alam-e-bala ko jan-nisar-e-vatan
Leave a Reply