Ek Purani Kahani

Zehra Nigaah

kisi shahr men ik kafan-chor aaya

jo raton ko qabron men surakh kar ke

tan-e-kushtagan se kafan khinch leta

akhir-e-kar pakda gaya

aur us ko munasib saza ho gai

kuchh hi din baad ik dusra chor varid hua

jo kafan bhi churata

qabr ko bhi khula chhod deta

dusra chor bhi rukn-e-insaf ke paas laaya gaya

aur mehman-e-zindan hua

phir yakayak kisi tisare chor ka ghul macha

jo kafan bhi churata

qabr ko bhi khula chhod deta

aur murda badan ko barahana kisi raah par daal deta

shahr vaale jab use adalat men laae

to qaazi ne us ki saza ko sunate hue

faisla yuun likha

”khudavand pahle kafan-chor ko apni rahmat men rakhna ki vo aadmi khuub tha”