Nikhat-E-Zulf Se Nindon Ko Basa de Aa Kar

Akhtar Shirani

nikhat-e-zulf se nindon ko basa de aa kar

meri jaagi hui raton ko sula de aa kar

fikr-e-farda o gham-e-dosh bhula de aa kar

phir usi naaz se divana bana de aa kar

ishq ko naghma-e-ummid suna de aa kar

dil ki soi hui qismat ko jaga de aa kar

kis qadar tiira o tarik hai duniya-e-hayat

jalva-e-husn se ik shama jala de aa kar

ishq ki chandni raten mujhe yaad aati hain

umr-e-rafta ko miri mujh se mila de aa kar

zindagi ban ke mire dil men sama ja salma

maut ik parda hai ye parda utha de aa kar

aag si dil men laga jaata hai tera har khat

aa mire khirman-e-hasti ko jala de aa kar

teri furqat men mire sher hain kitne ghamgin

muskurati hui nazron se hansa de aa kar

phir vahi ham hon vahi din hon vahi raten hon

ahd-e-rafta ko phir aina dikha de aa kar

shauq-e-nadida men lazzat hai magar naaz nahin

aa mire ishq ko maghrur bana de aa kar

shab-e-furqat pe miri hanste hain ai khanda-e-nur

mere qadmon pe sitaron ko gira de aa kar

tishna-e-husn huun ai saqi-mai-khana-e-husn

apne honton se phir ik jaam pila de aa kar

kab talak raunaq-e-sham-e-avadh ai mah-e-ravan

sham-e-lahore ko bhi subh bana de aa kar

ho chuki sair-e-baharan-kada-e-qaisar-bagh

bagh-e-lawrence men bhi phuul khila de aa kar

gomti dekh chuki jalva-e-ariz ki bahar

sath-e-ravi ko bhi aina bana de aa kar

tera ruman naya khvab hai ‘akhtar’ ke liye

aa aur is khvab ki tabir bata de aa kar