Tapish Se Phir Naghma-E-Junun Ki Surud-O-Chang-O-Rabab Tute

Zahida Zaidi

tapish se phir naghma-e-junun ki surud-o-chang-o-rabab tuute

kisi haqiqat ke ek sang-e-giran se takra ke khvab tuute

hayat ki ju-e-dard-o-gham men safine ummid-o-arzu ke

ba-shakl-e-mauj-e-nasim ubhre ba-rang-e-jism-e-habab tuute

suna rahi hain vafa ki rahen shikast-e-parvaz ka fasana

ki duur tak vadi-e-talab men pade hain har samt khvab tuute

barahna-pa aao tum bhi hamdam bas ab to sahra-e-arzu men

tamazat-e-reg-e-agahi se tilism-e-mauj-e-sarab tuute

yahi hai bazm-e-mai-gusaran to shart-e-sad-ehtiyat kyuun ho

kisi ke hathon men jaam chhalke kisi ka band-e-naqab tuute

chatakh rahe hain dilon ke saghar magar ye farman-e-charagar hai

na koi chashm-e-pur-ab chhalke na koi jam-e-sharab tuute