Siddiqa Shabnam
tuut kar andar se bikhre aur ham jal-thal hue
tujh se jab bichhde to itna roe ham badal hue
the kabhi abad jo zakhmon ke phulon se yahan
dekhna vo shahr is mausam men sab jangal hue
dhuup se mahrumiyon ki the hirasan log sab
ruuh ke azar se kuchh aur bhi pagal hue
jin se vabasta thi ‘shabnam’ zindagi ki har khushi
aah kaise log the nazron se jo ojhal hue
Leave a Reply