Kanch Ki Gudiya

Shaista Mufti

kanch nazuk hain khvab nazuk hain

tum qadam soch kar idhar rakhna

khelne ka tujhe hai shauq magar

in chatanon pe bhi nazar rakhna

tere dil men hai aarzu ki kiran

teri ankhon men khvab hain kal ke

tere hathon men rang-e-titli hain

tere chehre pe azm hain dahke

mere angan ki kanch ki gudiya

apni qismat ka imtihan na le

main tujhe shaad dekhna chahun

to andheron ka asman na le

dil pe biiti jo main ne sah li hai

khaar rahon se teri chun lungi

teri har ik khushi aziiz mujhe

tujh ko sansar ik naya dungi

meri gudiya magar ye kahti hai

mujh ko duniya to dekh lene do

kya hua gar mujhe bhi zakhm milen

gham-e-hasti ka vaar sahne do