Allama Iqbal
hazar khauf ho lekin zaban ho dil ki rafiq
yahi raha hai azal se qalandaron ka tariq
hujum kyuun hai ziyada sharab-khane men
faqat ye baat ki pir-e-mughan hai mard-e-khaliq
ilaj-e-zof-e-yaqin in se ho nahin sakta
gharib agarche hain ‘razi’ ke nukta-ha-e-daqiq
murid-e-sada to ro ro ke ho gaya taaib
khuda kare ki mile shaikh ko bhi ye taufiq
usi tilism-e-kuhan men asiir hai aadam
baghal men us ki hain ab tak butan-e-ahd-e-atiq
mire liye to hai iqrar-e-bil-lisan bhi bahut
hazar shukr ki mulla hain sahib-e-tasdiq
agar ho ishq to hai kufr bhi musalmani
na ho to mard-e-musalman bhi kafir o zindiq
Leave a Reply