Poet
nikali jaae kis tarkib se taqrir ki surat
vo aine ki surat aur main tasvir ki surat
giraftar-e-mohabbat kar liya baton hi baton men
tasalsul se numayan ho gai zanjir ki surat
ziyada aine se hai munavvar mushaf-e-ariz
aur is par khal-e-mushkin aya-e-tathir ki surat
tire tevar badalte hi zamana ho gaya dushman
hilal-e-id bhi zahir hua shamshir ki surat
sitam ho jaega gar baal bhi beka hua us ka
nikal kar aah siine se gai hai tiir ki surat
kabhi mithi nigahen hain kabhi tevar badalte hain
na marta huun na jiita huun ye hai taazir ki surat
maza kya us but-e-be-pir se dil ke lagane ka
jo khalvat men ho but mahfil men ho tasvir ki surat
khafa hote hi kuchh ka kuchh bhavon ka ho gaya naqsha
kabhi khanjar ki surat aur kabhi shamshir ki surat
jise mil jaae khak-e-pak-e-dasht-e-karbala ‘parvin’
palat kar bhi na dekhe vo kabhi iksir ki surat
Leave a Reply