Poet
ab koi tira misl nahin naz-o-ada men
andaz men shokhi men shararat men haya men
maghrur se sarkash mutavaze pe huun qurban
mitti men to mitti huun hava huun main hava men
kya khuub vo khud karte hain yuun apni sataish
aafat huun jalane men qayamat huun jafa men
ghairat nahin aati tumhen har baat men baithe
ulfat men mohabbat men muravvat men vafa men
jab ho dam-e-akhir to bacha lene ki taqat
phir khak-e-shifa men na kahin ab-e-baqa men
vo chahe to sab kuchh hai na chahe to nahin kuchh
taaviz men gande men fatile men dua men
ik adna sa parda hai ik adna sa tafavut
makhluq men maabud men bande men khuda men
surkhi ke sabab khuub khila hai gul-e-lala
aariz men labon men kaf-e-dast o kaf-e-pa men
ushshaq ki khun-rezi se kya faeda zalim
mashghul ho lakhe men to masruf hina men
ashiq to hamesha hai mohabbat ki badaulat
ilzam men taqsir men isyan men khata men
ham bhi the kabhi khubi-e-taqdir se ‘parvin’
arfat men muzdalfa men makka men mina men
Leave a Reply