Najma Shaheen Khosa
ajnabi shahar ki ajnabi shaam men
zindagi dhal gai malgaji shaam men
shaam ankhon men utri usi shaam ko
zindagi se gai zindagi shaam men
dard ki lahr men zindagi bah gai
umr yuun kat gai hijr ki shaam men
ishq par afrin jo salamat raha
us bikharti hui surmai shaam men
meri palkon ki chilman pe jo khvab the
vo to sab jal gae is bujhi shaam men
har taraf ashk aur siskiyan hijr ki
dard hi dard hai har ghadi shaam men
akhiri baar aaya tha milne koi
hijr mujh ko mila vasl ki shaam men
raat ‘shahin’ ankhon men katne lagi
is tarah gum hui raushni shaam men
Leave a Reply