Poet
ghar se jo shakhs bhi nikle vo sambhal kar nikle
jaane kis mod pe kis haath men khanjar nikle
moajaza ban gai kya aaj miri tishna-labi
ek qatre ke tale kitne samundar nikle
gir gaya ho jo fasilon ko utha kar khud hi
kaise ab apne hisaron se vo bahar nikle
rahbaro tum ne to manzil ka pata bhi na diya
tum se behtar to miri raah ke patthar nikle
umr bhar zehn men chubhta raha ik nashtar-e-gham
jitne ehsas the sab mera muqaddar nikle
tum se chhodi na gai rah-e-vafa phir bhi ‘hayat’
kitne be-dard mile kitne sitamgar nikle
Leave a Reply