Gulnar Aafreen
ai shahr-e-sitam-pesha bata kis ko sada duun
ab kaun raha hai jise paigham-e-vafa duun
shamil miri sanson men hai sadiyon ki aziyyat
aa gardish-e-dauran main tujhe bhi to dua duun
ashkon ke guhar bhi to nahin paas mire ab
main soch rahi huun gham-e-dauran tujhe kya duun
darti huun bikhar jaegi khakistar-e-jan bhi
bujhte hue shoalon main tumhen kaise hava duun
vo log jo sargarm-e-takallum hain sar-e-bazm
kaise unhen adab takallum ke sikha duun
ai raat sarabon ke siva kuchh na milega
main din ke ujale men agar shama jala duun
‘gulnar’ sar-e-shakh-e-chaman lala-o-gul ko
de de vo ijazat to mahakne ki ada duun
Leave a Reply