Fauziya Rabab
husn-e-sada ka vaar ankhen hain
bin tire be-qarar ankhen hain
meri janib hai jo tira chehra
meri janib hazar ankhen hain
aib tera kahan chhupega ab
shahr men be-shumar ankhen hain
main ne tarz-e-vafa tha apnaya
is liye ashk-bar ankhen hain
parsai kahan gai bolo
aaj kyon dagh-dar ankhen hain
ek naqsha tha khvab ka khincha
is liye taar taar ankhen hain
jaise in men sahab rahte hon
kitni zar-o-qatar ankhen hain
jin ki taabir men mile vahshat
aise khvabon pe baar ankhen hain
vo jo chehra hi padh nahin saktin
kitni jahil ganvar ankhen hain
vo nazar ar-par hoti hai
haae kya dil-figar ankhen hain
khvab dekha ‘rabab’ ne kyunkar
is liye su-e-dar ankhen hain
Leave a Reply