Ahmad Nadeem Qasmi
phir bhayanak tirgi men aa gae
ham gajar bajne se dhoka kha gae
haae khvabon ki khayaban-saziyan
aankh kya kholi chaman murjha gae
kaun the akhir jo manzil ke qarib
aaine ki chadaren phaila gae
kis tajalli ka diya ham ko fareb
kis dhundalke men hamen pahuncha gae
un ka aana hashr se kuchh kam na tha
aur jab palte qayamat dha gae
ik paheli ka hamen de kar javab
ik paheli ban ke har su chha gae
phir vahi akhtar-shumari ka nizam
ham to is takrar se ukta gae
rahnumao raat abhi baaqi sahi
aaj sayyare agar takra gae
kya rasa nikli dua-e-ijtihad
vo chhupate hi rahe ham pa gae
bas vahi memar-e-farda hain ‘nadim’
jin ko mere valvale raas aa gae
Leave a Reply